Fasnacht 2025
Dr Zeedel vom Dupf-Club Alti Garde
GLAUBET IS, MIR LIEGE NIE!
Oh, was fir e liederligi und schäbigi Wält!
Alles drait sich numme um Gäld,
Macht, Politigg und radikale Religioone,
wo me aane luegt Bschiss und Aggressioone,
jä, d Tagesschau isch so voll mit Verbräche,
dass schwachi Määge mien go bräche.
Wo me aaneluegt Myseere an Myseere,
däägligg dien sich die Myseere vermeere,
und kaine isch schuld, alli luege bedroffe,
me zaigt Beduure und duet innig hoffe,
aber denn zaigt me mit de Finger uffenand,
bhauptet Zyyg und beschuldigt enand.
Zue wäm kasch no Verdraue uffbaue,
wo mir sogar dr Kirche missdraue?
Isch das nit d Mueter vo allne Frooge
und e woori Antwort wäär glatt glooge,
denn wär nit bschysst, duet betriege,
und wär das nit macht, duet halt liege.
Das stimmt nit ganz, wänn mir do erwääne,
s git Usnaame und mir sinn aini vo dääne,
jä, s isch verruggt, dass es so eppis no git,
denn mir vom Dupf-Club liege nit.
Mir sinn moralisch absolut makelloos,
au dr Papscht verdraut is bedänggeloos,
dr Trump, wo d Woored gäärn verdrait,
jedem missdraut, wo d Woored sait,
dää maag is nit, het is uff dr Latte,
und dr Musk, rieft us em Trump sym Schatte:
This Dupf-Club isch totally suschpäggt,
numme X isch the real truth änd fäggt!
Und do wääre mir bi de soziaale Meedie,
im Grund gno mee e soziaali Drageedie,
wo wiene Güllefass fungziooniere duet,
denn Schyssdrägg verspritze, dien si guet.
S maischte isch gfelscht oder gschminggt,
bescheenigt, dass es zum Himmel stinggt,
villicht eventuell isch s woor oder au nit,
vellig egaal, au wenn s e Shitstorm git,
und alli bi TikTok und Konsorte maine,
si syge mit de Faggte im Raine.
Aber s git Lyt, wo d Woored nit verbiege:
Die vom Dupf-Club, die dien nie liege.
Jä iberhaupt, s Internet im Generelle
isch e Hort vo Gauner und Griminelle,
voor allem settsch nie in China bschtelle,
wenn de das wetsch, wo de hesch welle,
denn dä Billigschrott vo Temu und Shein
isch weniger Sein, derfir me Schein.
Derfir glaubet uns, mir verzelle kai Mischt,
vo uns grieget dir d Woored uffdischt.
Au d Politigg isch voller Luug und Truug,
lutter Phrase und hooli Woort, und im Zuug
vo de Abstimmige und de Waale
lyyde mir vom Dupf-Club Hellequaale,
unserei Sorg isch, wo is dr Schloof duet raube
dass me die falsche Versprächige kennti glaube.
Au d Behörde, däre me gäärn verdraue wet,
sich aber bi dr AHV e bitzeli verrächnet het,
hälfe nit geege die waggsende Bedängge,
im Geegedail, und so froggt sich e mängge:
Wäär isch no inteeger und nit dubioos?
Isch numme no dr Dupf-Club tadelloos?
Uff die Froog geen mir speeter no yy,
zerscht reede mir iber dr Walliser Wyy.
Dass dä panscht wird, isch kai Hoon,
das het scho fascht kantonali Dradizioon,
denn d Woored liggt im Vino,
sait dr Blatter und dr Infantino.
Vo de Produggt kemme mir zer Wäärbig,
au s Marketing het e zwyyfelhafti Fäärbig,
do wird iibertriibe und in Himmel ghoobe,
was niemerts bruucht, duet me loobe,
bis alli in Schaare in Laade laufe,
um gsundi Kinderschokolade z kaufe.
Drumm leent eich nit vo Schwätzer blände,
und diend eich lieber an Dupf-Club wände,
numme dert wärdet iir d Woored finde,
denn mir dien eich kai Saich uff d Nase binde.
Aber dr schlimmschti Luug isch dr Faggt,
dass bi Film und Foti aim dr Zwyyfel paggt,
isch das ächt oder het do epper manipuliert,
mit kinschtligger Intelligänz e bitz optimiert.
S aint und andere Bibeli ewägg retouschiere,
ka me im Allgemaine jo no aggzeptiere,
nur griege mir vo däm Foti s Gruuse,
wo dr Trump und d Harris schmuuse.
Isch das Realitäät oder Manipulazioon?
Villicht verbindet die e zarti Emmozioon?
Stelled eich vor, statt die baide us de USA,
wäär dr Jans grad an dr Amhärd dra.
Eso Bilder griegsch nimm us em Kopf,
eso ächt und doch abstraggt, jä Gopf-
verglemmi, wäär isch no eer und redligg,
usser dr Dupf-Club sälbschtverständligg,
aber vermuetligg isch es vellig egaal
und d Woored isch fir d Moraal marginaal,
villicht wott me d Woored gar nit heere,
und am Bschiss duet me sich kuum me steere,
und villicht gfallt s de Mensche uff dr Äärde
nach Strich und Faade belooge z wäärde.
Fasnacht 2024
Dupf-Club Alti Garde Fasnacht 2024
WIE HEUSCHREGGE SCHWÄRME SI USS!
Scho sit emme Zytli isch d Pandemyy verbyy,
und mir kenne wider eso syy, wie mir wette syy,
aigedlig sinn mir wie friener, also wie immer,
nit besser – nai – im Grund gnoo vyyl schlimmer.
Wär erinneret sich no an die stille Baanhoofshalle,
lääri Ziig und Drämmli, das het is no gfalle
oder dängget an die Rue in dr Yyflugschnaise
an staufreii Stroose, kuum epper isch go raise,
me het s erhoolsaam ghaa in dr Neechi und dehai,
aber das isch jetzt alles mumbitz und ainerlai.
Denn pletzlig frooge sich alli mit Entsetze:
Wär duet is die verlooreni Zyt ersetze?
Het me is nit e Dail vom Lääbe gstoole?
Villicht lott sich dervo eppis noochehoole?
Also schnäll ins Internet go sueche
und spontaan pauschali Ferie bueche.
Waansinn, heert me riefe, die dien sich loone,
die mondääne und exotische Destinazioone:
Mallorca, Menorca, Ibiza, oder au Nizza,
mit em Schiff vo La Spezia uff Venezia,
au Barcelona, Pamplona oder St. Chrischona
bietet me als ginschdigi Aggdzioon aa
ai Wuche mit Fluug und Halbpensioon
in emme Vierstärnschuppe, e Sensazioon!
Verzauberet grieche si denn us de Löcher,
zerscht ainzeln, denn noch und nöcher,
bueche e Rais an e Strand wyt ewägg,
styyge in die kurze Hoose, pagge s Gepägg,
Sunnebrülle und Käppli sinn schnäll montiert,
und wäärde denn an e Fluughaafe spediert.
Dert steen scho Dausigi vor em Schalter,
e Bild wie im Wimmelbuech "Wo isch Walter?",
me stoot sich uff de Fiess ummenand,
pfläggt Keerperkontaggt, dräumt vom Strand,
Goofe wänn Glace und sinn scho uff de Wegge,
s het au e baar, wo nimm so guet schmegge,
am Check-In reggt sich ain grad uff,
denn är zaalt fir e z schwääre Koffer druff,
anderi griege Lämpe, d Närve flattere,
well jeede wett dr beschti Blatz ergattere.
Nach zwai Stund wäärde die erschte waich,
finde s langsam e Zuemuetig und e Saich,
druffaabe stopft me die mürbe Tourischte
wie Sardyyne in ain vo dääne Billigfluugkischte,
und fliegt si in Süüde, wo s allne duet gfalle,
wo si wie Heuschregge ibers Baredyys häärfalle.
D Heuschregge und d Tourischte, die baide
dien sich nämmlig kuum unterschaide,
denn si hinterleen Zersteerig und Drägg,
als wäär e Tornado driiber ewägg.
Scho im alte Teschtamännt het dr Moses droot,
dass es de Egiipter an Graage goot,
und die achti Bloog si haimsueche duet,
e allesfrässendi, zersteererischi Insäggtefluet.
Es sinn nit e baar Tourischte, das kasch vergässe
es sinn Millioone, wo dien d Büffet leerfrässe,
wo Stränd aneggtiere, wie dr Putin d Krim,
und dert wiete, wie dr Putin so schlimm,
wo Paris iberfluete und Florännz bsetze,
uff em Mount Everest iber Lyyche hetze,
wo Venedig verstopfe, mit Flaniere isch dert Schluss,
als hätt die Stadt e akute Darmverschluss,
wo Selfies mache und däne d Sicht verstelle,
wo e Bligg uff e Kultuurguet hänn wäärfe welle,
wo freiwillig uff Gryzfaartschiff geen
und sich dert wie Batteryy-Hiener halte leen,
wo sich am Pool in Flaischsalaat leege,
sich am liebschte im Schwarm beweege,
am beschte wenn epper sait, wo s aane goot,
und als Fierer vor se aane stoot.
Jä, d Massetourischte sinn e Phenomeen,
denn die haige schyynts ganz anderi Geen,
settigi mit integrierter Schwarmfunggzioon,
e offesichtligge Pfusch vo dr Evoluzioon,
e anderi Ergläärig findet me nit,
dass es si numme als kritischi Masse git.
Und kemme si eso richtig zur Enfaltig,
sinn d Kollateraalschäde gewaltig,
denn dert, wo Touridampfer qualme,
iir Schwereel-Ruess verdaile iber d Palme,
wo all die Uspüff uff em Wääg in Süüde
Abgaas broduziere und Luft vergüüde,
wo volli Touribomber starte im Minutetaggt,
jedes Triibwärgg si Kerosin in Himmel jaggt,
wo iire Mischt am Strand ligge blybt,
wo me dr letscht Yyhaimisch zum Daifel drybt,
oder däm si Seel kauft fir billig Gäld,
stirbt e Sehenswiirdigkait uff dääre Wält.
Drumm singe die beriemte Fischer vo Capri:
Wenn bi Capri die roti Sunne im Meer versinggt,
im Ooberoot e Gryzfaartschiff zum Himmel stinggt,
e schwarze Schwaif am Firmamännt hinterlott,
dängg e Pott voll Tourischte, wo niemerts wott.
Und mir bätte, dass dä Kaan nit halte duet,
denn so Horde, wo iberborde, dien is nit guet,
wo luut und sperrig allne uff e Sänggel geen,
und zue allem aane sinn si nit seer scheen.
Bella, bella, bella Marie, mir sinn muff
uff d Tourischte, jä die reege is uff.
Bella, bella, bella Marie, wäär het die ghoolt?
Jä, wäär het die ghoolt? E gueti Froog!
Wäär wintscht sich scho esoone Bloog?
»D Gaister, wo me rieft« heert me glaage,
»Sälber tschuld!« heert me anderi saage,
die Lyyddraagende frooge sich bloos:
Wie wäärde mir die Sieche wider loos?
Aber villicht isch das Iibel wider schnäll verbyy,
denn epper baschtlet jo immer anere Pandemyy ...
WIE HEUSCHREGGE SCHWÄRME SI USS!
Scho sit emme Zytli isch d Pandemyy verbyy,
und mir kenne wider eso syy, wie mir wette syy,
aigedlig sinn mir wie friener, also wie immer,
nit besser – nai – im Grund gnoo vyyl schlimmer.
Wär erinneret sich no an die stille Baanhoofshalle,
lääri Ziig und Drämmli, das het is no gfalle
oder dängget an die Rue in dr Yyflugschnaise
an staufreii Stroose, kuum epper isch go raise,
me het s erhoolsaam ghaa in dr Neechi und dehai,
aber das isch jetzt alles mumbitz und ainerlai.
Denn pletzlig frooge sich alli mit Entsetze:
Wär duet is die verlooreni Zyt ersetze?
Het me is nit e Dail vom Lääbe gstoole?
Villicht lott sich dervo eppis noochehoole?
Also schnäll ins Internet go sueche
und spontaan pauschali Ferie bueche.
Waansinn, heert me riefe, die dien sich loone,
die mondääne und exotische Destinazioone:
Mallorca, Menorca, Ibiza, oder au Nizza,
mit em Schiff vo La Spezia uff Venezia,
au Barcelona, Pamplona oder St. Chrischona
bietet me als ginschdigi Aggdzioon aa
ai Wuche mit Fluug und Halbpensioon
in emme Vierstärnschuppe, e Sensazioon!
Verzauberet grieche si denn us de Löcher,
zerscht ainzeln, denn noch und nöcher,
bueche e Rais an e Strand wyt ewägg,
styyge in die kurze Hoose, pagge s Gepägg,
Sunnebrülle und Käppli sinn schnäll montiert,
und wäärde denn an e Fluughaafe spediert.
Dert steen scho Dausigi vor em Schalter,
e Bild wie im Wimmelbuech "Wo isch Walter?",
me stoot sich uff de Fiess ummenand,
pfläggt Keerperkontaggt, dräumt vom Strand,
Goofe wänn Glace und sinn scho uff de Wegge,
s het au e baar, wo nimm so guet schmegge,
am Check-In reggt sich ain grad uff,
denn är zaalt fir e z schwääre Koffer druff,
anderi griege Lämpe, d Närve flattere,
well jeede wett dr beschti Blatz ergattere.
Nach zwai Stund wäärde die erschte waich,
finde s langsam e Zuemuetig und e Saich,
druffaabe stopft me die mürbe Tourischte
wie Sardyyne in ain vo dääne Billigfluugkischte,
und fliegt si in Süüde, wo s allne duet gfalle,
wo si wie Heuschregge ibers Baredyys häärfalle.
D Heuschregge und d Tourischte, die baide
dien sich nämmlig kuum unterschaide,
denn si hinterleen Zersteerig und Drägg,
als wäär e Tornado driiber ewägg.
Scho im alte Teschtamännt het dr Moses droot,
dass es de Egiipter an Graage goot,
und die achti Bloog si haimsueche duet,
e allesfrässendi, zersteererischi Insäggtefluet.
Es sinn nit e baar Tourischte, das kasch vergässe
es sinn Millioone, wo dien d Büffet leerfrässe,
wo Stränd aneggtiere, wie dr Putin d Krim,
und dert wiete, wie dr Putin so schlimm,
wo Paris iberfluete und Florännz bsetze,
uff em Mount Everest iber Lyyche hetze,
wo Venedig verstopfe, mit Flaniere isch dert Schluss,
als hätt die Stadt e akute Darmverschluss,
wo Selfies mache und däne d Sicht verstelle,
wo e Bligg uff e Kultuurguet hänn wäärfe welle,
wo freiwillig uff Gryzfaartschiff geen
und sich dert wie Batteryy-Hiener halte leen,
wo sich am Pool in Flaischsalaat leege,
sich am liebschte im Schwarm beweege,
am beschte wenn epper sait, wo s aane goot,
und als Fierer vor se aane stoot.
Jä, d Massetourischte sinn e Phenomeen,
denn die haige schyynts ganz anderi Geen,
settigi mit integrierter Schwarmfunggzioon,
e offesichtligge Pfusch vo dr Evoluzioon,
e anderi Ergläärig findet me nit,
dass es si numme als kritischi Masse git.
Und kemme si eso richtig zur Enfaltig,
sinn d Kollateraalschäde gewaltig,
denn dert, wo Touridampfer qualme,
iir Schwereel-Ruess verdaile iber d Palme,
wo all die Uspüff uff em Wääg in Süüde
Abgaas broduziere und Luft vergüüde,
wo volli Touribomber starte im Minutetaggt,
jedes Triibwärgg si Kerosin in Himmel jaggt,
wo iire Mischt am Strand ligge blybt,
wo me dr letscht Yyhaimisch zum Daifel drybt,
oder däm si Seel kauft fir billig Gäld,
stirbt e Sehenswiirdigkait uff dääre Wält.
Drumm singe die beriemte Fischer vo Capri:
Wenn bi Capri die roti Sunne im Meer versinggt,
im Ooberoot e Gryzfaartschiff zum Himmel stinggt,
e schwarze Schwaif am Firmamännt hinterlott,
dängg e Pott voll Tourischte, wo niemerts wott.
Und mir bätte, dass dä Kaan nit halte duet,
denn so Horde, wo iberborde, dien is nit guet,
wo luut und sperrig allne uff e Sänggel geen,
und zue allem aane sinn si nit seer scheen.
Bella, bella, bella Marie, mir sinn muff
uff d Tourischte, jä die reege is uff.
Bella, bella, bella Marie, wäär het die ghoolt?
Jä, wäär het die ghoolt? E gueti Froog!
Wäär wintscht sich scho esoone Bloog?
»D Gaister, wo me rieft« heert me glaage,
»Sälber tschuld!« heert me anderi saage,
die Lyyddraagende frooge sich bloos:
Wie wäärde mir die Sieche wider loos?
Aber villicht isch das Iibel wider schnäll verbyy,
denn epper baschtlet jo immer anere Pandemyy ...
Fasnacht 2023
Dupf-Club Alti Garde Fasnacht 2023
Uns isch unwool!
Liebi Menschinne und Mensche, es duet is laid,
so goot s nimm wyter, hänn mir is gsait,
mir mien do in aller Scheerfi broteschtiere
und is glaar vo dääre Fasnacht dischtanziere.
Mir finde dä Bruuch nämli gar nimm so guet,
well är sich kulturell aaeigne duet
und sich zue allem aane mit beesem Spott
uff Keschte vo andere beluschtige wott.
Vor allem Goschdyym und Laarve sinn fataal,
drunter verschwinde Hemmige und Moraal,
und me nimmt fremdi Ydentideete aa,
ooni derfiir e Erlaubnis z haa.
Kai Waggis het jee e Elsässer gfroggt,
eb s iin nit gruusig bloggt,
dass me iin als versoffene Biezer zaigt,
wo zmitts im Gsicht e gwaltige Zingge drait.
Oder het jee ain vomene Zircher wisse welle,
eb s rächt isch, dass me iin in e Liecht duet stelle,
wo bräggt isch vo lauwarmer Luft,
wo usere riisige Schnuure pufft.
Und erscht d Schwoobe, die arme Sieche
(das sinn die grad ääne an Rieche)
duet me uff s greebschte kompromittiere,
was mir glaar als Rassismus klassifiziere.
Irr miend verstoo, dass is das Unwoolsyy beraitet,
schliessligg sinn mir empfindsaam und zartbesaitet,
wintsche, dass allne Gerächigkeit duet widerfaare
und wänn jeedem Diskriminierige erspaare.
Aber d Fasnacht scheert sich drumm e Drägg
und s Comité luegt grossziigi driiber ewägg,
wenn dr Winnetou, die eerehafti Roothut,
(derzue raimt sich iibrigens beschtens Rootgrut),
wird mit falsche Fäädere, Pfyyl und Booge
reschpäggtlos dur dr Gaggoo zooge,
und was is au so gruusig duet schogge
isch die bekiffti Figuur mit filzige Logge.
Sells e Jamaikaaner si? Oder aine vo deene,
us däre linggs-autonoome Szeene?
Oder e Laarve mit digge Lippe und schwarzem Gsicht,
kai Sau reggt sich uff oder goot vor Gricht,
derzue umme Ranze e Reggli us Bascht,
aifach schregglig, do keerble mir fascht
voor luuter Unwoolsyy und Wuet,
und frooge is, wiesoo denn kaine yygryffe duet.
Zem Gligg sinn d Russe nit grad in Moode,
au Chineese verliere glaar an Boode,
was is vorsichtig d Hoffnig schänggt,
dass niemerts an soone Süsche dänggt,
denn dr Ping und dr Puting, die baide hätte
geege d Fasnacht glatt e Grieg losdrätte.
Drum gheert s schlichtwägg verbotte,
iber fremdi Kultuure z spotte,
sogar zu de Araber sett me nätt syy,
wo sunscht kauft me no Gas und Eel yy,
jä, Reschpäggt und Aggzeptanz isch neetig,
das isch die modärni Form vo Ethig,
drumm syyged »woke« und schnäll still,
looset, was unseri Botschaft saage will:
Aigedlig sinn mir jo alli glyych,
eb gääl, schwarz, arm oder ryych,
eb mir hetero oder homo sinn
oder irgendnaime zwischedrinn,
eb wyss, bruun, au grien, das goot
am beschte ganz linggs und root,
eb verglemmt oder pervers,
Hauptsach d Wält isch divers.
Also skandiere mir luut und radikaal:
D Fasnacht e Skandaal, unkorräggt und unsoziaal!
D Fasnacht e Skandaal, unkorräggt und unsoziaal!
D Fasnacht e Skand ... äh ...
Ouh, und eppis hätte mir fascht vergässe,
uff das isch e gerächti Wält kuum versässe,
denn es git jo Männerglygge, was firchterlig steert,
denn vo LGBTQI hänn die jo no gar nyt gheert,
hänn bi dr Glyychberächtigung vellig versait,
sinn numme e Huffe toxischi Männligkait,
wo statt Sanftmuet und Verständnis z zaige,
maine, dass si grausaam diggi Aier haige.
Und wenn sich die Männer denn no gedraue,
sich z goschdymiere als Fraue,
isch das sexuelle Raub, e kriminelle Aggt,
drumm isch is unwool, sin vom Entsetze paggt.
S Nivoo vo de Männerglygge isch e Fiasko.
Me froggt sich: Wie dief abe singge ka s no?
Aber s wird laider z befirchte syy,
das goot dene Fasnächtler am Arsch verbyy,
die wärde wyterhin beesi Schüsche wääle,
um Unschuldigi und Politiger z quääle,
und das syyg Wältkultuur, sait d UNESCO.
Welles Gremium isch denn uff dä Furz koo?
Sicher e Huffe korrupti Männer, alt und wyss,
die mache mit Bedängge kuum e Gschyss,
mache s wie d FIFA, die Walliser Mafia-Filiaale,
pfyffe uff Menscherächt und leen sich gärn zaale.
Unerträägligg, wie me unseri Gfiel verletzt,
was uns in e mega Unwoolsyy versetzt,
schlimm, wie d Fasnacht d Kultuure misshandlet
und die soziaali Harmonyy verschandlet.
Drumm broteschtiere mir, denn dä Karnevall
isch e absolut dringende Sanierigsfall,
und mir demonstriere, was hesch was gisch,
bis d Fasnacht farb- und zaanloos isch,
und unseri hailigi Missioon ändet erscht,
wenn drei Daag trischti Korräggthait herrscht.
Uns isch unwool!
Liebi Menschinne und Mensche, es duet is laid,
so goot s nimm wyter, hänn mir is gsait,
mir mien do in aller Scheerfi broteschtiere
und is glaar vo dääre Fasnacht dischtanziere.
Mir finde dä Bruuch nämli gar nimm so guet,
well är sich kulturell aaeigne duet
und sich zue allem aane mit beesem Spott
uff Keschte vo andere beluschtige wott.
Vor allem Goschdyym und Laarve sinn fataal,
drunter verschwinde Hemmige und Moraal,
und me nimmt fremdi Ydentideete aa,
ooni derfiir e Erlaubnis z haa.
Kai Waggis het jee e Elsässer gfroggt,
eb s iin nit gruusig bloggt,
dass me iin als versoffene Biezer zaigt,
wo zmitts im Gsicht e gwaltige Zingge drait.
Oder het jee ain vomene Zircher wisse welle,
eb s rächt isch, dass me iin in e Liecht duet stelle,
wo bräggt isch vo lauwarmer Luft,
wo usere riisige Schnuure pufft.
Und erscht d Schwoobe, die arme Sieche
(das sinn die grad ääne an Rieche)
duet me uff s greebschte kompromittiere,
was mir glaar als Rassismus klassifiziere.
Irr miend verstoo, dass is das Unwoolsyy beraitet,
schliessligg sinn mir empfindsaam und zartbesaitet,
wintsche, dass allne Gerächigkeit duet widerfaare
und wänn jeedem Diskriminierige erspaare.
Aber d Fasnacht scheert sich drumm e Drägg
und s Comité luegt grossziigi driiber ewägg,
wenn dr Winnetou, die eerehafti Roothut,
(derzue raimt sich iibrigens beschtens Rootgrut),
wird mit falsche Fäädere, Pfyyl und Booge
reschpäggtlos dur dr Gaggoo zooge,
und was is au so gruusig duet schogge
isch die bekiffti Figuur mit filzige Logge.
Sells e Jamaikaaner si? Oder aine vo deene,
us däre linggs-autonoome Szeene?
Oder e Laarve mit digge Lippe und schwarzem Gsicht,
kai Sau reggt sich uff oder goot vor Gricht,
derzue umme Ranze e Reggli us Bascht,
aifach schregglig, do keerble mir fascht
voor luuter Unwoolsyy und Wuet,
und frooge is, wiesoo denn kaine yygryffe duet.
Zem Gligg sinn d Russe nit grad in Moode,
au Chineese verliere glaar an Boode,
was is vorsichtig d Hoffnig schänggt,
dass niemerts an soone Süsche dänggt,
denn dr Ping und dr Puting, die baide hätte
geege d Fasnacht glatt e Grieg losdrätte.
Drum gheert s schlichtwägg verbotte,
iber fremdi Kultuure z spotte,
sogar zu de Araber sett me nätt syy,
wo sunscht kauft me no Gas und Eel yy,
jä, Reschpäggt und Aggzeptanz isch neetig,
das isch die modärni Form vo Ethig,
drumm syyged »woke« und schnäll still,
looset, was unseri Botschaft saage will:
Aigedlig sinn mir jo alli glyych,
eb gääl, schwarz, arm oder ryych,
eb mir hetero oder homo sinn
oder irgendnaime zwischedrinn,
eb wyss, bruun, au grien, das goot
am beschte ganz linggs und root,
eb verglemmt oder pervers,
Hauptsach d Wält isch divers.
Also skandiere mir luut und radikaal:
D Fasnacht e Skandaal, unkorräggt und unsoziaal!
D Fasnacht e Skandaal, unkorräggt und unsoziaal!
D Fasnacht e Skand ... äh ...
Ouh, und eppis hätte mir fascht vergässe,
uff das isch e gerächti Wält kuum versässe,
denn es git jo Männerglygge, was firchterlig steert,
denn vo LGBTQI hänn die jo no gar nyt gheert,
hänn bi dr Glyychberächtigung vellig versait,
sinn numme e Huffe toxischi Männligkait,
wo statt Sanftmuet und Verständnis z zaige,
maine, dass si grausaam diggi Aier haige.
Und wenn sich die Männer denn no gedraue,
sich z goschdymiere als Fraue,
isch das sexuelle Raub, e kriminelle Aggt,
drumm isch is unwool, sin vom Entsetze paggt.
S Nivoo vo de Männerglygge isch e Fiasko.
Me froggt sich: Wie dief abe singge ka s no?
Aber s wird laider z befirchte syy,
das goot dene Fasnächtler am Arsch verbyy,
die wärde wyterhin beesi Schüsche wääle,
um Unschuldigi und Politiger z quääle,
und das syyg Wältkultuur, sait d UNESCO.
Welles Gremium isch denn uff dä Furz koo?
Sicher e Huffe korrupti Männer, alt und wyss,
die mache mit Bedängge kuum e Gschyss,
mache s wie d FIFA, die Walliser Mafia-Filiaale,
pfyffe uff Menscherächt und leen sich gärn zaale.
Unerträägligg, wie me unseri Gfiel verletzt,
was uns in e mega Unwoolsyy versetzt,
schlimm, wie d Fasnacht d Kultuure misshandlet
und die soziaali Harmonyy verschandlet.
Drumm broteschtiere mir, denn dä Karnevall
isch e absolut dringende Sanierigsfall,
und mir demonstriere, was hesch was gisch,
bis d Fasnacht farb- und zaanloos isch,
und unseri hailigi Missioon ändet erscht,
wenn drei Daag trischti Korräggthait herrscht.